ຂ່າວສານ
ຄະນະກົດໝາຍ, ເສດຖະສາດ ແລະ ການເງິນ (FDEF) ຂອງປະເທດລຸກຊຳບວກ ໄດ້ສືບຕໍ່ເຝິກອົບຮົມ “ການນຳໃຊ້ຫ້ອງສະໝຸດອີເລັກໂຕຣນິກ (E-library)”. ທ່ານນາງ ເຈເວເຈນນິຕ້າ (Jevgenija Sevcova), ຜູ້ປະສານງານໂຄງການຈາກ EIFL ຮ່ວມກັບ ດຣ. ເພີຣີນ ຊິມອນ ໄດ້ດຳເນີນການເຝິກອົບຮົມທາງໄກ ຄັ້ງວັນທີ 21 ທັນວາ 2020 ແລະ 2 ກຸມພາ 2021.
ທ່ານນາງ ເຈເວເຈນນິຕ້າ ໄດ້ໃຫ້ການນຳສະເໜີຜ່ານໂປຣແກຣມຊູມ Zoom ແລະ ມີນາຍແປພາສາແປບົດນຳສະເໜີດັ່ງກ່າວໄປພ້ອມໆກັນໃນຫ້ອງເຝິກອົບຮົມທີ່ ຄນລ. ການເຝິກອົບຮົມດັ່ງກ່າວ ມີເປົ້າໝາຍເຝິກນັກບັນນາຮັກ ແລະ ອາສາສະໝັກ ICT ປະມານ 15 ຄົນ ໃຫ້ຮູ້ວິທີເຂົ້ານຳໃຊ້ຫ້ອງສະໝຸດອີເລັກໂຕຣນິກໄດ້. ເປົ້າໝາຍຫຼັກກໍຄື ຢາກໃຫ້ພວກເຂົາສາມາດຊ່ວຍຜູ້ອື່ນໃນການເຂົ້ານຳໃຊ້ຫ້ອງສະໝຸດດິຈິຕອລໃຫ້ໄດ້ຄືກັນກັບພວກເຂົາ.
ຫ້ອງສະໝຸດດິຈິຕອລ ກໍຄືຫ້ອງສະໝຸດທີ່ສາມາດເຂົ້ານຳໃຊ້ໄດ້ໂດຍຜ່ານອິນເຕີເນັດ, ເຊິ່ງຜູ້ໃຊ້ສາມາດເຂົ້າເຖິງຖານຂໍ້ມູນອອນລາຍທີ່ມີ ປຶ້ມອີເລັກໂຕຣນິກ (e-books), ວາລະສານວິຊາການ ແລະ ອື່ນໆເຊັ່ນ ວາລະສານ ແລະ ໜັງສືພິມ.
ເຂົ້າໄປທີ່ເວັບໄຊ້ຂອງ ຄນລ ໄດ້ທີ່: http://flp.nuol.edu.la/e-library/
ຂ່າວສານ
ໂຄງການຮ່ວມມືລະຫວ່າງມະຫາວິທະຍາໄລລຸກຊຳບວກ ແລະ ມະຫາວິທະຍາໄລແຫ່ງຊາດລາວ ໄດ້ໃຫ້ຄວາມຊ່ວຍເຫຼືອໃນການເຝິກຊ້ອມການແຂ່ງຂັນສານຈຳລອງ ວ່າດ້ວຍກົດໝາຍມະນຸດສະທຳສາກົນ ທີ່ ຄນລ ມາເປັນເວລາ 4 ປີແລ້ວ. ໃນປີນີ້ ວັນທີ 11 ພະຈິກ 2020 ໂຄງການຍັງໄດ້ຈັດພິທີມອບໃບຢັ້ງຢືນ ເພື່ອເປັນການຊົມເຊີຍທີມທີ່ໄດ້ເຂົ້າຮ່ວມການແຂ່ງຂັນໃນລະດັບສາກົນແຕ່ບໍ່ໄດ້ເດີນທາງໄປທີ່ຮົງກົງໃນຄັ້ງທີ່ຜ່ານມາ ແລະ ຖືໂອກາດນີ້ເລີ່ມຕົ້ນກຽມການແຂ່ງຂັນລະດັບປະເທດຄັ້ງທີ 19.
ໃນອາທິດທຳອິດຂອງເດືອນທັນວາ 2020, ການເຝິກຊ້ອມການແຂ່ງຂັນສານຈຳລອງ ແມ່ນຈັດຂຶ້ນຜ່ານຊູມ ໂດຍ ດຣ. ລໍເຣັ້ນ ຊິຣີ ຜູ້ທີ່ມາມີສ່ວນຮ່ວມໃນການແຂ່ງຂັນສານຈຳລອງດັ່ງກ່າວໃນໄລຍະ 2 ປີທີ່ຜ່ານມາ. ການເຝິກຊ້ອມດັ່ງກ່າວ ດຳເນີນໄປເປັນເວລາໜຶ່ງອາທິດ ແລະ ເຂົ້າຮ່ວມໂດຍນັກສຶກສາ ຄນລ 12-15 ຄົນ. ນັກສຶກສາໄດ້ຮຽນຮູ້ກ່ຽວກັບວິທີການວ່າຄວາມ, ການສະແດງຈຸດຢືນຂອງຕົນຢ່າງມີເຫດຜົນ ແລະ ໄດ້ຄວາມຮູ້ເລິກເຊິ່ງກ່ຽວກັບກົດໝາຍມະນຸດສະທຳສາກົນ ແລະ ກົດໝາຍອາຍາສາກົນ.
ການແຂ່ງຂັນສານຈຳລອງ ເປັນກິດຈະກຳທີ່ສຳຄັນເນື່ອງຈາກມັນເຮັດໃຫ້ຜູ້ເຂົ້າຮ່ວມໄດ້ຮຽນຮູ້ຜ່ານການແກ້ບັນຫາ ແລະ ສົ່ງເສີມການຮຽນການສອນຜ່ານການປະຕິບັດຕົວຈິງ. ນອກຈາກ ນັກສຶກສາຈະໄດ້ພັດທະນາທັກສະທາງກົດໝາຍແລ້ງ ຍັງໄດ້ເພີ່ມທັກສະທາງການເວົ້າ, ການໂຕ້ວາທີ ແລະ ພາສາອັງກິດອີກດ້ວຍ.
ຂ່າວສານ
ໃນວັນທີ 20-22 ມັງກອນ 2021 ໂຄງການຮ່ວມມືລະຫວ່າງມະຫາວິທະຍາໄລ ຮ່ວມກັບໂຄງການ LAO/031 ຂອງອົງການ LuxDev ໄດ້ຈັດການເຝິກອົບຮົມກ່ຽວກັບການຄັດລອກຜົນງານຄົນອື່ນ (plagiarism) ແລະ ຈັນຍາບັນການຄົ້ນຄວ້າ (research ethics) ຢູ່ທີ່ ເມືອງວັງວຽງ. ການເຝິກອົບຮົມດັ່ງກ່າວ ແມ່ນດຳເນີນເປັນພາສາອັງກິດ ແລະ ໄດ້ເຂົ້າຮ່ວມໂດຍອາຈານຈາກ ຄນລ ຈຳນວນ 20 ຄົນ.
ການເຝິກອົບຮົມຄັ້ງນີ້ ແມ່ນຢູ່ໃນຂອບການຊ່ວຍເຫຼືອຂອງໂຄງການພວກເຮົາໃນການສ້າງ “ຄູ່ມືໃນການຄົ້ນຄວ້າທາງກົດໝາຍ” ໂຄງການຮ່ວມມືຂອງລຸກຊຳບວກ ໄດ້ໃຫ້ຄວາມສຳຄັນແກ່ການຮັບຮູ້ລັກສະນະພິເສດຂອງກົດໝາຍ, ການຍົກລະດັບມາດຕະຖານໃນການເຮັດການຄົ້ນຄວ້າ ແລະ ຄວາມຊື່ສັດໃນການຄົ້ນຄວ້າວິທະຍາສາດ. ບົດຊີ້ນຳທີ່ຈະສ້າງ ແມ່ນເພື່ອອະທິບາຍບັນດາລະບຽບພື້ນຖານກ່ຽວກັບຄວາມຊື່ສັດທາງວິຊາການ ແລະ ການຄັດລອກຜົນງານຄົນອື່ນ ເຊິ່ງນີ້ອາດຈະເປັນບາດກ້າວທຳອິດກ່ອນທີ່ຈະມີການຂຽນວາລະສານກົດໝາຍ ຫຼື ການຮັບຮອງເອົາ “ປະມວນຫຼັກຈັນຍາບັນໃນການຄົ້ນຄວ້າ” ຂອງ ມຊ.
ພາຍໃນງານສຳມະນາ ບັນດາຜູ້ເຂົ້າຮ່ວມໄດ້ສົນທະນາກັນກ່ຽວກັບຄວາມໝາຍຂອງຈັນຍາບັນທາງວິຊາການ ແລະ ການລັກເອົາຜົນງານຂອງຜູ້ອື່ນມາໃຊ້ວ່າເປັນຂອງຕົນ, ມີທັງການນຳສະເໜີໂດຍ ດຣ. ເພີຣີນ ຊິມອນ ແລະ ດຣ. ບົວລະພຽນ ສີສຸກ (ອາຈານ ຄນລ) ແລະ ດຣ. ລັດດາວັນ ດອນແກ້ວດາວົງ. ງານສຳມະນາດັ່ງກ່າວ ແມ່ນເພື່ອອະທິບາຍແຈ້ງກ່ຽວກັບວ່າ ການຄັດລອກຜົນງານຄົນອື່ນໝາຍຄວາມວ່າແນວໃດ ໂດຍມີການຍົກຕົວຢ່າງ ແລະ ຍົກໃຫ້ເຫັນວ່າເປັນຫຍັງການຈັດການກັບບັນຫາດັ່ງກ່າວຈຶ່ງເປັນສິ່ງສຳຄັນ. ຜູ້ເຂົ້າຮ່ວມ ຍັງໄດ້ປຶກສາຫາລືວິທີທີ່ເປັນໄປໄດ້ໃນການແກ້ບັນຫາ ເພື່ອທີ່ຈະປັບປຸງຈັນຍາບັນທາງວິຊາການ ແລະ ຫລຸດຜ່ອນການຄັດລອກຜົນງານຂອງຜູ້ອື່ນມາໃຊ້ວ່າເປັນຂອງຕົນ. ຜູ້ເຂົ້າຮ່ວມໄດ້ມີການເຮັດກິດຈະກຳເປັນກຸ່ມ ເຊິ່ງໃນນັ້ນພວກເຂົາຕ້ອງຊອກຫາຄວາມໝາຍຕົວຢ່າງທີ່ຢູ່ໃນເວັບໄຊຂອງມະຫາວິທະຍາໄລຕ່າງໆ ແລະ ວ່າພວກເຂົາຈັດການກັບບັນຫາດັ່ງກ່າວແນວໃດ.
ຫຼັງຈາກເຝິກອົບຮົມ ບັນດາຜູ້ເຂົ້າຮ່ວມໄດ້ຈົດບັນທຶກບັນດາລະບຽບພື້ນຖານທີ່ຄວນມີໃນຄູ່ມື ແລະ ໃຫ້ຄຳເຫັນກ່ຽວກັບສິ່ງທີ່ ຄນລ ແລະ ມຊ ຈະເຮັດຕໍ່ໄປໃນການປັບປຸງຈັນຍາບັນທາງວິຊາການ ແລະ ຫລຸດຜ່ອນການຄັດລອກຜົນງານຄົນອື່ນ.
ຄູ່ມືການຄົ້ນຄວ້າທາງນິຕິສາດ ເປັນເຄື່ອງມືສຳຄັນອັນໜຶ່ງໃນການເພີ່ມທະວີຄວາມເຂົ້າໃຈກ່ຽວກັບການຄົ້ນຄວ້າທາງກົດໝາຍ ແລະ ການຄົ້ນຄວ້າທີ່ມີຄຸນນະພາບ. ຄູ່ມືດັ່ງກ່າວ ນອກຈາກຈະເປັນການຍົກລະດັບມາດຕະຖານການຄົ້ນຄວ້າທາງດ້ານກົດໝາຍແລ້ວ ມັນຍັງຈະເປັນແບບຢ່າງນຳໃຊ້ໃນຂົງເຂດລັດຖະສາດ, ເວົ້າເລື່ອງການຄັດລອກຜົນງານຂອງຜູ້ອື່ນ ແລະ ຈັນຍາບັນການຄົ້ນຄວ້າໃນລະດັບ ມຊ ອີກດ້ວຍ.
ຂ່າວສານ
ໂຄງການຮ່ວມມືລະຫວ່າງມະຫາວິທະຍາໄລ ໄດ້ຈັດການຮຽນການສອນ “ໂຮງຮຽນກົດໝາຍຊ່ວງລະດູໜາວ” ທີ່ມີການປະສົມປະສານທາງເຕັກໂນໂລຊີ ໃນວັນທີ 15-17 ທັນວາ 2020 ທີ່ເມືອງວັງວຽງ ເຊັ່ນດຽວກັບ ໂຮງຮຽນກົດໝາຍຊ່ວງລະດູແລ້ງ ທີ່ຈັດຂຶ້ນໃນປີ 2019. ໃນການເຂົ້າຮ່ວມ ແມ່ນມີການຄັດເລືອກເອົາ 12 ຄົນ ອີງໃສ່ຄວາມສົນໃຈໃນການພັດທະນາຄວາມຮູ້ກ່ຽວກັບກົດໝາຍ ແລະ ລະດັບພາສາອັງກິດຂອງຕົນ ໄປຮ່ວມສຳມະນາທີ່ເປັນພາສາອັງກິດທັງໝົດເປັນເວລາສາມມື້.
ການສຳມະນາຄັ້ງນີ້ ແມ່ນມີເນື້ອໃນກ່ຽວກັບ “ຫຼັກການກ່ຽວກັບລັດແຫ່ງກົດໝາຍ” ເຊິ່ງເນັ້ນໜັກໃສ່ຫຼັກນິຕິທຳ (ເຊັ່ນຫຼັກການນິຕິທຳ, ຫຼັກການບໍ່ມີຜົນຍ້ອນຫຼັງ ແລະ ການນຳໃຊ້ກົດໝາຍໃນຊ່ວງເວລາໃດໜຶ່ງ) ແລະ ການເຂົ້າເຖິງຂະບວນການຍຸຕິທຳ ແລະ ການໄດ້ຮັບການໄຕ່ສວນທີ່ເປັນທຳ (ເຊັ່ນຄວາມເປັນເອກະລາດຂອງຜູ້ພິພາກສາ ແລະ ການສັນນິຖານວ່າເປັນຜູ້ບໍລິສຸດ). ຜູ້ບັນຍາຍຫຼັກ ແມ່ນ ດຣ. ລໍເຣັ້ນ ຊີຣີ ແລະ ດຣ. ເພີຣີນ ຊິມອນ ແລະ ຍັງມີ ສຈ. ສະເຕຟານ ບຣວມ ມາຮ່ວມໃນບາງຊ່ວງຂອງການສົນທະນາ. ໃນແຕ່ລະຊ່ວງຈະປະກອບມີທັງພາກທິດສະດີ ແລະ ພາກປະຕິບັດ ເຊິ່ງຜູ້ເຂົ້າຮ່ວມຈະໄດ້ເຮັດວຽກຮ່ວມກັນວິເຄາະກໍລະນີຕົວຢ່າງຕ່າງໆ.
ໃນພາກທິດສະດີກໍຈະມີການເບິ່ງວິດີໂອທີ່ຖືກບັນທຶກໄວ້ແລ້ວ ຫຼື ເປັນການບັນຍາຍສົດຜ່ານໂປຣແກຣມຊູມ ແລະ ໃນພາກປະຕິບັດຕົວຈິງ ແມ່ນນຳພາໂດຍ ເພີຣີນ. ຜູ້ເຂົ້າຮ່ວມທຸກຄົນ ໄດ້ປະກອບສ່ວນຢ່າງຕັ້ງໜ້າໃນການສົນທະນາກ່ຽວກັບຄວາມໝາຍຂອງລັດແຫ່ງກົດໝາຍໃນບໍລິບົດຂອງລາວ, ອຳນາດໃນການຕີຄວາມກົດໝາຍຂອງຜູ້ພິພາກສາ, ຄວາມຫຍຸ້ງຍາກໃນການເຂົ້າເຖິງຄຳຕັດສິນຂອງສານ, ຈັນຍາບັນຂອງຜູ້ພິພາກສາ ແລະ ສິດຂອງຈຳເລີຍ. ການມີສ່ວນຮ່ວມຂອງນັກກົດໝາຍ ແມ່ນມີຄວາມສຳຄັນ ແລະ ເຮັດໃຫ້ການເຝິກອົບຮົມຄັ້ງນີ້ມີປະສິດທິຜົນຫຼາຍ ໃນການຕີຄວາມເນື້ອໃນຂອງກົດໝາຍບາງມາດຕາ ແລະ ການນຳໃຊ້ກົດໝາຍດັ່ງກ່າວໃນຕົວຈິງ.
ຂ່າວສານ
ມະຫາວິທະຍາໄລລຸກຊຳບວກ ໄດ້ໃຫ້ຄວາມຊ່ວຍເຫຼືອຄະນະນິຕິສາດ ແລະ ລັດຖະສາດ ຂອງ ມຊ ໃນການຮ່າງ guidelines ການຄົ້ນຄວ້າທາງກົດໝາຍ. ທາງຄະນະໄດ້ແຕ່ງຕັ້ງຄະນະກຳມະການຮ່າງ ໂດຍປະກອບມີບັນດາອາຈານຈຳນວນໜຶ່ງ ແລະ ນຳພາການຄົ້ນຄວ້າໂດຍຮອງຄະນະບໍດີ 2 ທ່ານ, ນອກນັ້ນ ຍັງໄດ້ຮັບການຊ່ວຍເຫຼືອຈາກຜູ້ປະສານງານໂຄງການຮ່ວມມືລະຫວ່າງມະຫາວິທະຍາໄລອີກດ້ວຍ.
ຄະນະກຳມະການດັ່ງກ່າວ ມີການພົບປະກັນເດືອນລະຄັ້ງໃນການເຝິກອົບຮົມນຳພາໂດຍ ດຣ. ເພີຣີນ ຊິມອນ ເພື່ອປຶກສາຫາລືລະອຽດກ່ຽວກັບເນື້ອໃນຂອງ guidelines ຕາມດ້ວຍການວາງຫົວຂໍ້/ຫົວບົດຕ່າງໆ ໂດຍ ດຣ. ເພີຣີນ ຊິມອນ ຮ່ວມກັບ ດຣ. ລັດດາວັນ ດອນແກ້ວດາວົງ (ຮອງຫົວໜ້າພະແນກຄົ້ນຄວ້າວິທະຍາສາດ ແລະ ບໍລິການວິຊາການ). Guidelines ດັ່ງກ່າວຈະມີບົດກ່ຽວກັບລັກສະນະພິເສດຂອງການຄົ້ນຄວ້າທາງກົດໝາຍ, ແຫຼ່ງຂອງກົດໝາຍ, ການຄັດລອກຜົນງານຄົນອື່ນ (plagiarism) ແລະ ຈັນຍາບັນການຄົ້ນຄວ້າ (research ethics), ວິທີອ້າງອີງເອກະສານ ແລະ ການຈັດໂຄງຮ່າງຂອງການຄົ້ນຄວ້າທາງກົດໝາຍ. ຮ່າງ guidelines ແມ່ນຄາດວ່າຈະຖືກນຳສະເໜີທີ່ ຄນລ ພາຍໃນເດືອນເມສາ ຫຼື ພຶດສະພາ ແລະ ຖືກຮັບຮອງໂດຍ ຄນລ ແລະ ມຊ ພາຍໃນລະດູແລ້ງ ປີ 2021. ການສ້າງ guidelines ນີ້ ແມ່ນຮ່ວມຈັດຕັ້ງ ແລະ ໃຫ້ການຊ່ວຍເຫຼືອທາງດ້ານງົບປະມານໂດຍອົງການ LuxDev (ໂຄງການ Lao/031).
ການເຝິກອົບຮົມຄັ້ງທຳອິດ ແມ່ນວັນທີ 25 ພະຈິກ ເຊິ່ງມີເນື້ອໃນກ່ຽວກັບລັກສະນະພິເສດຂອງການຄົ້ນຄວ້າທາງນິຕິສາດ. ບັນດາຜູ້ເຂົ້າຮ່ວມໄດ້ສົນທະນາກ່ຽວກັບວ່າການຄົ້ນຄວ້າທາງກົດໝາຍແມ່ນຫຍັງ, ສິ່ງໃດແດ່ທີ່ນອນໃນ ຫຼື ບໍ່ນອນໃນການຄົ້ນຄວ້າທາງກົດໝາຍ. ພວກເຂົາຍັງໄດ້ຊອກຫາເອກະສານກ່ຽວກັບກົດໝາຍປົກຄອງຕົນເອງ autonomy of law (ບົດຄວາມວິຊາການ, ຄຳເວົ້າຂອງຄະນະບໍດີຄະນະກົດໝາຍ, ຫຼັກສູດຂອງມະຫາວິທະຍາໄລທີ່ຢູ່ຕ່າງປະເທດ ແລະ ອື່ນໆ) ແລະ ນຳສະເໜີຂໍ້ມູນທີ່ຕົນສາມາດຫາໄດ້ໃຫ້ຜູ້ເຂົ້າຮ່ວມຜູ້ອື່ນໄດ້ຮັບຟັງນຳ.
ການເຝິກອົບຮົມຄັ້ງທີສອງ ແມ່ນວັນທີ 23 ທັນວາ ເຊິ່ງໄດ້ເນັ້ນໜັກກ່ຽວກັບແຫຼ່ງຂໍ້ມູນທາງກົດໝາຍ ທັງແຫຼ່ງຂໍ້ມູນຫຼັກ ແລະ ສຳຮອງ. ຜູ້ເຂົ້າຮ່ວມໄດ້ມີການສົນທະນາກັນວ່າ ນັກຄົ້ນຄວ້າຄວນເລືອກໃຊ້ແຫຼ່ງຂໍ້ມູນໃດເມື່ອເຮັດບົດຄົ້ນຄວ້າທາງກົດໝາຍ. ຜູ້ເຂົ້າຮ່ວມຕ້ອງໄດ້ຊອກຫາປຶ້ມແບບຮຽນກົດໝາຍ ແລະ ບົດຄວາມວິຊາການທາງກົດໝາຍ ເພື່ອມານຳສະເໜີແກ່ຜູ້ເຂົ້າຮ່ວມຜູ້ອື່ນວ່າແຫຼ່ງຂໍ້ມູນຫຼັກໆທີ່ທົ່ວໂລກນິຍົມໃຊ້ເຂົ້າໃນການຄົ້ນຄວ້າ. ການເຝິກອົບຮົມ ແມ່ນປິດທ້າຍໂດຍການຍົກບັນດາແຫຼ່ງຂໍ້ມູນທາງກົດໝາຍຫຼັກ ແລະ ແຫຼ່ງສຳຮອງທີ່ບັນດາຄູອາຈານ ແລະ ນັກສຶກສາທີ່ ຄນລ ຄວນນຳໃຊ້ເຂົ້າໃນການຄົ້ນຄວ້າ.
ຂ່າວສານ
ໃນວັນທີ 9 ທັນວາ 2020, ການແຂ່ງຂັນສານຈຳລອງ ວ່າດ້ວຍກົດໝາຍມະນຸດສະທຳສາກົນ ຂັ້ນປະເທດ ໄດ້ຈັດຂຶ້ນທີ່ ຄນລ ໂດຍການຊ່ວຍເຫຼືອຈາກ ມະຫາວິທະຍາໄລລຸກຊຳບວກ. ການແຂ່ງຂັນປີນີ້ຖືວ່າຂ້ອນຂ້າງພິເສດ ເນື່ອງຈາກວ່າ ຄະນະກຳມະການສ່ວນໜຶ່ງຕັດສິນເອົາທີມທີ່ຊະນະການແຂ່ງຂັນຜ່ານທາງອອນລາຍ ໂດຍໃຊ້ໂປຣແກຣມຊູມ.
ການແຂ່ງຂັນ ແມ່ນມີທັງໝົດ 6 ທີມເຂົ້າແຂ່ງຂັນ ເຊິ່ງໜຶ່ງທີມປະກອບມີ 2 ຄົນ. ການແຂ່ງຂັນ ແມ່ນດຳເນີນເປັນພາສາອັງກິດ ເຊິ່ງແຕ່ລະທີມໄດ້ພັດປ່ຽນກັນເປັນຝ່າຍຈຳເລີຍ ແລະ ຝ່າຍໄອຍະການ ແກ້ຟ້ອງ/ສັ່ງຟ້ອງຄະດີສົມມຸດໃນທີ່ປະຊຸມສານສານອາຍາສາກົນ. ຄະນະຜູ້ພິພາກສາ ແມ່ນປະກອບມີ ທ່ານ ສິບປະກອນ ຊົງຊູວະນິດ (ທີ່ປຶກສາກົດໝາຍ ຈາກຄະນະກຳມະການການແດງສາກົນ) ທີ່ເຂົ້າຮ່ວມຜ່ານລະບົບອອນລາຍ, ທ່ານ ນາງ ໂຊເຟຍ ຄາສັນ ຈາກມູນນິທິອາຊີ (ຫົວໜ້າໂຄງການ ໂຄງການຊ່ວຍເຫຼືອທາງກົດໝາຍໃນລາວ) ແລະ ດຣ. ບົວລະພຽນ ສີສຸກ (ອາຈານ ຈາກ ຄນລ) ໄດ້ເຂົ້າຮ່ວມ ທີ່ ຄນລ.
ບັນດາທີມທີ່ເຂົ້າຮ່ວມ ໄດ້ມີການເຝິກຊ້ອມໃນລະຫວ່າງເດືອນພະຈິກ ຫາ ເດືອນທັນວາ ໂດຍມະຫາວິທະຍາໄລລຸກຊຳບວກ ກັບ ດຣ. ເພີຣີນ ຊິມອນ ແລະ ດຣ. ລໍເຣັ້ນ ຊິຣີ ທັງໃນຕົວຈິງ ແລະ ອອນລາຍ.
ສານຈຳລອງຄັ້ງນີ້ ທີ່ຈັດຂຶ້ນໂດຍອົງການກາແດງສາກົນ ເປັນການກະຕຸ້ນການຄິດວິເຄາະໂດຍໃຊ້ກົດໝາຍ, ຊ່ວຍໃຫ້ເຮົາຮຽນຮູ້ທີ່ຈະຫາຈຸດຢືນຂອງຕົນ. ນັກສຶກສາຍັງໄດ້ມີໂອກາດພັດທະນາທັກສະການນຳສະເໜີ, ການໂຕ້ວາທີ ແລະ ພາສາອັງກິດອີກດ້ວຍ!
ພວກເຮົາຂໍສະແດງຄວາມຍິນດີກັບທຸກທີມທີ່ເຂົ້າຮ່ວມ ແລະ ໂດຍສະເພາະທີມຂອງ ນ. ນຸດທິດາ ມີສຸພັນ ແລະ ນ. ດາວປະກາຍ ສຸວັນນະລາດ ທີ່ໄດ້ຮັບຕຳແໜ່ງທີມຊະນະເລີດ ເຊິ່ງຈະໄປແຂ່ງຂັນຕໍ່ໃນການແຂ່ງຂັນສານຈຳລອງລະດັບສາກົນໃນເດືອນມີນາ 2021 ທີ່ຈະມາເຖິງນີ້!
ຂ່າວສານ
ໃນຂອບການຮ່ວມມືຂອງໂຄງການຮ່ວມມືລະຫວ່າງມະຫາວິທະຍາໄລ ລາວ-ລຸກຊຳບວກ ມະຫາວິທະຍາໄລລຸກຊຳບວກໄດ້ຈັດການບັນຍາຍຄັ້ງທຳອິດທີ່ມີການປະສົມປະສານເຕັກໂນໂລຊີຂຶ້ນ! ດຣ. ບາຊັກ ບາລາຍານ ຈາກຄະນະກົດໝາຍ, ເສດຖະສາດ ແລະ ການເງິນ, ມະຫາວິທະຍາໄລລຸກຊຳບວກ ໄດ້ໃຫ້ການບັນຍາຍຜ່ານຊູມ Zoom ແກ່ນັກສຶກສາ ແລະ ຄູອາຈານ ຈຳນວນ 50 ຄົນ ຈາກຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ, ພາຍໃຕ້ຫົວຂໍ້ “ສິດທິມະນຸດ ແລະ ອົງການສະຫະປະຊາຊາດ”. ດຣ. ບາລາຍານ ໄດ້ມີສ່ວນຮ່ວມໃນໂຄງການຂອງພວກເຮົາມາເປັນເວລາ 3 ປີແລ້ວ. ດຣ. ບາລາຍານ ເປັນຜູ້ຊ່ຽວຊານທີ່ມີຊື່ສຽງ ແລະ ມີຜົນງານການຂຽນຢ່າງກວ້າງຂວາງໃນຂົງເຂດສິດທິມະນຸດ ໂດຍສະເພາະສິດທິທາງທຸລະກິດ ແລະ ສິດທິມະນຸດ.
ເນື່ອງຈາກຜົນຕອບຮັບທີ່ດີຈາກການບັນຍາຍໃນຄັ້ງນີ້, ພວກເຮົາຈະຈັດການບັນຍາຍທາງອິນເຕີເນັດຫຼາຍຂຶ້ນໃນອີກໄວໆນີ້!
ຂ່າວສານ
ການເຝິກອົບຮົມກ່ຽວກັບ ວິທີການນຳໃຊ້ຫ້ອງສະໝຸດອີເລັກໂຕຣນິກທີ່ສ້າງໂດຍມະຫາວິທະຍາໄລລຸກຊຳບວກ ໄດ້ຖືກຈັດຂຶ້ນໃນວັນທີ 8 ຫາ 11 ກັນຍາ 2020 ພາຍໃຕ້ຂອບການຮ່ວມມືຂອງໂຄງການຮ່ວມມືລະຫວ່າງມະຫາວິທະຍາໄລ. ບັນດາພະນັກງານຫໍສະໝຸດຄະນະນິຕິສາດ ແລະ ລັດຖະສາດ ແລະ ຫໍສະໝຸດສູນກາງມະຫາວິທະຍາໄລແຫ່ງຊາດ ໄດ້ຮຽນຮູ້ວິທີການນຳໃຊ້ຫໍສະໝຸດດິຈິຕອລ ໂດຍການຊ່ວຍເຫຼືອຈາກບັນດາພະນັກງານຫໍສະໝຸດຂອງ ມະຫາວິທະຍາໄລທຳມະສາດ.
ຜ່ານການສຳມະນາທາງຊູມ Zoom ເຊິ່ງນຳພາໂດຍ ທ່ານນາງ ພິມພາຂວັນ ທະນານົບພະຣິດ, ທ່ານນາງ ອະໂຣຊາ ເຫຼົ່າຣັກວົງ ແລະ ທ່ານນາງ ຊານິນພອນ ສູ່ໂຊກວິລາວົງ ຈາກປະເທດໄທ ແລະ ທ່ານນາງ ດຣ ເພີຣີນ ຊີມອນ, ຈາກປະເທດຝຣັ່ງ. ການສຳມະນາອອນລາຍໃນຄັ້ງນີ້ ໄດ້ຖືກຈັດຂຶ້ນ ທີ່ ຫ້ອງໄອຊີທີ (ICT) ຂອງ ຄນລ, ອຳນວຍຄວາມສະດວກໂດຍ ອາຈານ ສັງຄອນ ນິຍົມຄຳ ຫົວໜ້າພະແນກ IT ຈາກ ຄນລ.
ຫ້ອງສະໝຸດອີເລັກໂຕຣນິກ (E-library) ແມ່ນຖືວ່າເປັນເຄື່ອງມືທີ່ຈຳເປັນໃນການຂະຫຍາຍການເຂົ້າເຖິງຄວາມຮູ້ ແລະ ນອກສະຖາບັນການສຶກສາ. ພ້ອມທັງ, ຍັງເປັນເຄື່ອງມື ໃຫ້ຄູອາຈານກະກຽມການສິດສອນ ແລະ ຄົ້ນຄ້ວາ. ເຊິ່ງພວກເຮົາຈະມີການຝຶກອົບຮົມເພີ່ມເຕີມອີກໃນໄວໆນີ້!
ທ່ານສາມາດເຂົ້າໄປເບິ່ງເວບໄຊທ໌ ຫ້ອງສະໝຸດອີເລັກໂຕຣນິກຂອງ ຄນລ ໄດ້ທີ່: http://flp.nuol.edu.la/e-library/
ຂ່າວສານ
ມະຫາວິທະຍາໄລລຸກຊຳບວກ ໄດ້ສືບຕໍ່ຊ່ວຍເຫຼືອ ແລະ ຈັດງານຝຶກອົບຮົມກ່ຽວກັບ “ວິທີນຳໃຊ້ຫ້ອງສະໝຸດອີເລັກໂຕຣນິກ (E-library)”. ຜ່ານການຕົກລົງລະຫວ່າງໂຄງການພວກເຮົາ ແລະ EIFL, ໃນວັນທີ 2-3 ກັນຍາ 2020 ການເຝິກອົບຮົມທາງອອນລາຍໄດ້ຖືກດຳເນີນຂຶ້ນເປັນພາສາໄທ, ນຳສະເໜີໂດຍບັນດານັກບັນນາຮັກ ຈາກມະຫາວິທະຍາໄລທຳມະສາດ. ບັນດາອາຈານທັງໝົດ 12 ທ່ານໄດ້ເຂົ້າຮ່ວມການສຳມະນາອອນລາຍ, ນຳພາໂດຍ ທ່ານນາງ ພິມພາຂວັນ ທະນານົບພະຣິດ, ຈາກປະເທດໄທ ແລະ ທ່ານນາງ ດຣ ເພີລີນ ຊີມອນ, ຈາກປະເທດຝຣັ່ງ ຈັດຂຶ້ນຜ່ານການເຊື່ອມຕໍ່ທາງຊູມ Zoom.
ບັນດາອາຈານໄດ້ເຂົ້າຮ່ວມໃນການສຳມະນາອອນລາຍ ທີ່ຫ້ອງໄອຊີທີ (ICT) ທີ່ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດ, ອຳນວຍຄວາມສະດວກ ແລະ ຊ່ວຍເຫຼືອໃນການຈັດໂດຍ ອາຈານ ສັງຄອນ ນິຍົມຄຳ. ຫ້ອງສະໝຸດອີເລັກໂຕຣນິກ ແມ່ນຖືວ່າເປັນເຄື່ອງມືທີ່ຈຳເປັນໃນການຂະຫຍາຍການເຂົ້າເຖິງຄວາມຮູ້ພາຍໃນ ແລະ ນອກສະຖາບັນການສຶກສາ. ພ້ອມທັງ, ຍັງເປັນເຄື່ອງມື ເພື່ອໃຫ້ຄູອາຈານກະກຽມໃນການສິດສອນ ແລະ ການຄົ້ນຄ້ວາ. ເຊິ່ງພວກເຮົາຈະມີການຝຶກອົບຮົມເພີ່ມເຕີມອີກໃນໄວໆນີ້!
ຫ້ອງສະໝຸດອີເລັກໂຕຣນິກ ແມ່ນຫໍສະມຸດແບບດີຈິຕອລ ທີ່ສາມາດເຂົ້າເຖິງຜ່ານອິນເຕີເນັດເຊິ່ງສາມາດເຂົ້າເຖິງຖານຂໍ້ມູນທາງອິນເຕີເນັດທີ່ປະກອບດ້ວຍ: ບັນດາປື້ມອີເລັກໂຕຣນິກ (e-books), ວາລະສານວິຊາການ ແລະ ແຫຼ່ງຂໍ້ມູນອື່ນໆຫຼາຍຢ່າງເຊັ່ນ: ວາລະສານ ແລະ ໜັງສືພິມ. ທ່ານສາມາດເຂົ້າໄປເບິ່ງເວບໄຊທ໌ ຫ້ອງສະໝຸດອີເລັກໂຕຣນິກ (E-library) ຂອງ ຄນລ ໄດ້ທີ່: http://flp.nuol.edu.la/e-library/
ຂ່າວສານ
ມະຫາວິທະຍາໄລລຸກຊຳບວກໄດ້ສືບຕໍ່ສະໜັບສະໜູນການພັດທະນາຫ້ອງສະໝຸດອີເລັກໂຕຣນິກ E-library ໃໝ່ທີ່ໃຫ້ການສະໜັບສະໜູນໂດຍໂຄງການຂອງພວກເຮົາ. ການເຝິກອົບຮົມຄັ້ງທີ 3 ພາຍໃຕ້ຫົວຂໍ້ ‘ວິທີການນຳໃຊ້ຫ້ອງສະໝຸດອີເລັກໂຕຣນິກ’ ໄດ້ຈັດຂຶ້ນທີ່ຄະນະນິຕິສາດ ແລະ ລັດຖະສາດ ໃນວັນທີ 5 ສິງຫາ ທີ່ຜ່ານມາ.
ມີທັງໝົດ 11 ທ່ານໄດ້ເຂົ້າຮ່ວມການເຝິກອົບຮົມທາງອອນລາຍ ໂດຍແມ່ນ ທ່ານນາງ ເຈເວເຈນນິຕ້າ ຈາກ EIFL ເປັນຜູ້ນຳການບັນຍາຍຜ່ານຊູມ Zoom. ໃນຂະນະດຽວກັນ, ເຈົ້າໜ້າທີ່ປະສານງານຂອງມະຫາໄລລຸກຊຳບວກ ດຣ. ເພີລີນ ກໍໄດ້ເຂົ້າຮ່ວມເພື່ອຊ່ວຍເຫຼືອຜູ້ເຂົ້າຮ່ວມໃນຄັ້ງນີ້. ຫ້ອງສະໝຸດອີເລັກໂຕຣນິກ ເປັນເຄື່ອງມືສຳຄັນເພື່ອເສີມສ້າງການເຂົ້າເຖິງຄວາມຮູ້ ແລະ ເປັນເຄື່ອງມືສຳຄັນຂອງບັນດາອາຈານໃນການກະກຽມການສອນ ແລະ ເຮັດບົດຄົ້ນຄວ້າ. ພວກເຮົາຈະຍັງມີການເຝິກອົບຮົມຄັ້ງອື່ນໆຕາມມາໄວໆນີ້!
E-library ແມ່ນ ຫ້ອງສະໝຸດໃນຮູບແບບອີເລັກໂຕຣນິກ ຫຼື ດິຈິຕອລ ທີ່ສາມາດເຂົ້ານຳໃຊ້ຜ່ານອິນເຕີເນັດ ເຮັດໃຫ້ເຮົາໄດ້ເຂົ້າເຖິງຖານຂໍ້ມູນອອນລາຍ ປະກອບມີທັງປຶ້ມ (ປຶ້ມເອເລັກໂຕຣນິກ), ວາລະສານວິຊາການ ແລະ ອີກຫຼາຍແຫຼ່ງຂໍ້ມູນ ເຊັ່ນວ່າ ວາລະສານ ແລະ ໜັງສືພິມ. ເຂົ້າໄປຢ້ຽມຢາມເວັບໄຊຂອງ ຄນລ ໄດ້ທີ່: http://flp.nuol.edu.la/e-library/
ຂ່າວສານ
ມະຫາວິທະຍາໄລລຸກຊຳບວກໄດ້ສືບຕໍ່ສະໜັບສະໜູນການພັດທະນາຫ້ອງສະໝຸດອີເລັກໂຕຣນິກ E-library ທີ່ສ້າງຂຶ້ນເມື່ອບໍ່ດົນມານີ້. ການເຝິກອົບຮົມຄັ້ງທີ 2 ພາຍໃຕ້ຫົວຂໍ້ ‘ວິທີການນຳໃຊ້ຫ້ອງສະໝຸດອີເລັກໂຕຣນິກ’ ໄດ້ຈັດຂຶ້ນທີ່ຄະນະນິຕິສາດ ແລະ ລັດຖະສາດ ໃນວັນທີ 17 ມິຖຸນາທີ່ຜ່ານມາ. ຜູ້ເຂົ້າຮ່ວມແມ່ນຄູອາຈານທັງໝົດ 13 ຄົນ ໄດ້ເຂົ້າຮ່ວມການເຝິກອົບຮົມທາງອອນລາຍ ຫຼື ທາງໄກ ໂດຍແມ່ນ ທ່ານນາງ ເຈເວເຈນນິຕ້າ ຈາກ EIFL ເປັນຜູ້ນຳການບັນຍາຍຜ່ານ Zoom. ໃນຂະນະດຽວກັນ, ເຈົ້າໜ້າທີ່ປະສານງານ ດຣ. ເພີຣີນ ຊິມອນ ກໍໄດ້ເຂົ້າຮ່ວມເພື່ອຊ່ວຍເຫຼືອຜູ້ເຂົ້າຮ່ວມໃນຄັ້ງນີ້.
ຫ້ອງສະໝຸດອີເລັກໂຕຣນິກເປັນເຄື່ອງມືສຳຄັນເພື່ອເສີມສ້າງການເຂົ້າເຖິງຄວາມຮູ້ ແລະ ເປັນມືສຳຄັນຂອງບັນດາອາຈານໃນການກະກຽມການສອນ ແລະ ເຮັດບົດຄົ້ນຄວ້າ. ພວກເຮົາຈະຍັງມີການເຝິກອົບຮົມຄັ້ງອື່ນໆຕາມມາໄວໆນີ້!
E-library ແມ່ນ ຫ້ອງສະໝຸດໃນຮູບແບບອີເລັກໂຕຣນິກ ຫຼື ດິຈິອລທີ່ສາມາດເຂົ້ານຳໃຊ້ໄດ້ຜ່ານອິນເຕີເນັດ ເຮັດໃຫ້ເຮົາໄດ້ເຂົ້າເຖິງຖານຂໍ້ມູນ ປະກອບທັງປຶ້ມ (ປຶ້ມເອເລັກໂຕຣນິກ e-book), ວາລະສານວິຊາການ ແລະ ອີກຫຼາຍແຫຼ່ງຂໍ້ມູນ ເຊັ່ນ ວາລະສານ ແລະ ໜັງສືພິມ. ເຂົ້າໄປຢ້ຽມຢາມເວັບໄຊຂອງ ຄນລ ໄດ້ທີ: http://flp.nuol.edu.la/e-library/
ຂ່າວສານ
ການສະໜັບສະໜຸນຂອງ ມະຫາວິທະຍາໄລລຸກຊຳບວກ ໃນການສ້າງຫ້ອງສະໝຸດອີເລັກໂຕຣນິກ (e-library) ໃຫ້ແກ່ຄະນະນິຕິສາດ ແລະ ລັດຖະສາດ, ມະຫາວິທະຍາໄລແຫ່ງຊາດລາວ ໄດ້ດຳເນີນໄປຢ່າງຕໍ່ເນື່ອງ ຕາມຂໍ້ຕົກລົງທີ່ເຊັນກັບອົງການ “EIFL” (ຂໍ້ມູນເອເລັກໂຕຣນິກສຳລັບຫໍສະໝຸດ) ໃນເດືອນພະຈິກ 2019. E-library ແມ່ນຫ້ອງສະໝຸດແບບດິຈິຕອລ ທີ່ສາມາດເຂົ້າເຖິງໄດ້ຜ່ານເວັບໄຊຂອງ ຄນລ (http://flp.nuol.edu.la/e-library/) ທີ່ສາມາດຊ່ວຍໃຫ້ທຸກຄົນເຂົາເຖິງຄັງຂໍ້ມູນທາງອອນລາຍເຊັ່ນ: ປຶ້ມອີເລັກໂຕຣນິກ, ວາລະສານວິຊາການ, ແລະ ແຫຼ່ງຂໍ້ມູນອື່ນໆ ເຊັ່ນ ບັນດາວາລະສານ ແລະ ໜັງສືພິມ.
ໃນວັນທີ 13 ພຶດສະພາ ທີ່ຜ່ານມານີ້, ການເຝິກອົບຮົມທາງອິນເຕີເນັດຄັ້ງທຳອິດກ່ຽວກັບ “ວິທີການນຳໃຊ້ຫ້ອງສະໝຸດອີເລັກໂຕຼນິກ” ໄດ້ຖືກຈັດຂຶ້ນໃຫ້ແກ່ອາຈານສອນ ແລະ ພະນັກງານຫໍສະໝຸດຂອງ ຄນລ ຫຼາຍກວ່າ 50 ຄົນ. ການເຝິກອົບຮົມດັ່ງກ່າວ ແມ່ນນຳພາໂດຍ ທ່ານນາງ ນັນທະລັດ ນົນທິວັດວະນິດ ເຊິ່ງເປັນນັກວິສະວະກອນບໍລິການກ້ອງສະໝຸດຈາກ EBSCO Thailand. ນີ້ກໍຖືວ່າ ແມ່ນເຄື່ອງມືທີ່ຈຳເປັນໃນການສ້າງຄວາມເຂັ້ມແຂງທາງດ້ານກົດໝາຍ ແລະ ການຄົ້ນຄວ້າ! ການຝຶກອົບຮົມອື່ນໆແມ່ນຈະຕາມມາໃນໄວໆນີ້!
ຂ່າວສານ
ຄະນະນິຕິສາດ, ເສດຖະສາດ ແລະ ການເງິນ, ມະຫາວິທະຍາໄລລຸກຊຳບວກ ຍັງສືບຕໍ່ຊຸກຍູ້ການຄົ້ນຄວ້າທາງດ້ານກົດໝາຍໃນປະເທດລາວ ເຖິງວ່າຢູ່ໃນໄລຍະນີ້ຈະມີປິດເມືອງເນື່ອງຈາກການແຜ່ລະບາດຂອງ Covid-19 ກໍຕາມ. ທ່ານ ສຈ. ສະເຕຟານ ບຣວມ ແລະ ດຣ. ເພີຣີນ ຊິມອນ ໄດ້ຈັດການເຝິກອົບຮົມການຄົ້ນຄ້ວາທາງດ້ານກົດໝາຍແບບອອນລາຍຂຶ້ນ ໃນວັນພະຫັດທີ່ຜ່ານມາ, ເຂົ້າຮວ່ມໂດຍບັນດາຄູອາຈານທັງໝົດ 6 ທ່ານຈາກຄະນະນິຕິສາດ ແລະ ລັດຖະສາດ, ມະຫາວິທະຍະໄລແຫ່ງຊາດລາວ, ເຊິ່ງບັນດາອາຈານແມ່ນໄດ້ຮັບການສະໜັບສະໜູນ ຈາກມະຫາວິທະຍາໄລລຸກຊຳບວກໃນການຄົ້ນຄວ້າ. ບັນດາຄູອາຈານທີ່ມາຮ່ວມລ້ວນແຕ່ເປັນອາຈານທີ່ໄດ້ໄປຄົ້າຄວ້າຢູ່ທີ່ປະເທດລຸກຊຳບວກ ຫຼື ຖືກຄັດເລືອກໃຫ້ໄປໃນປີນີ້. ເຖິງວ່າຈະມີໄລຍະທາງທີ່ຫ່າງໄກກັນ, ພວກເຂົາທັງໝົດລ້ວນແຕ່ໄດ້ຮັບໝາກຜົນຈາກການໄປແລກປ່ຽນບົດຮຽນດ້ານກົດໝາຍໃນຄັ້ງນີ້!
ຂ່າວສານ
ດຣ. ເພີຣີນ ຊິມອນ ຜູ້ປະສານງານ ຈາກມະຫາວິທະຍາໄລລຸກຊຳບວກ ໄດ້ໃຫ້ການບັນຍາຍທາງອິນເຕີເນັດກ່ຽວກັບ “ຫຼັກຖານໃນການດຳເນີນຄະດີອາຍາ” ເປັນຄັ້ງທຳອິດໃນປີ 2020 ເຊິ່ງການບັນຍາຍ ແມ່ນຈັດຂຶ້ນວັນທີ 10 ເມສາ 2020 ໃນໄລຍະການປິດເມືອງ. ໃນການບັນຍາຍຂອງ ດຣ. ເພີຣີນ ໄດ້ເນັ້ນໜັກອະທິບາຍເຖິງຄວາມສຳຄັນຂອງຫຼັກຖານໃນການດຳເນີນຄະດີທາງອາຍາ, ຄວາມຫຍຸ້ງຍາກຂອງພິສູດຫຼັກຖານ, ວັດຖຸທີ່ສາມາດເປັນຫຼັກຖານ, ພ້ອມທັງຫຼັກຖານທີ່ເປັນທີ່ຖືວ່າເປັນທີ່ຍອມຮັບໂດຍສານ. ການບັນຍາຍ ແມ່ນດຳເນີນຜ່ານທາງຊູມ, ມີຜູ້ເຂົ້າຮ່ວມເຖິງ 70 ທ່ານ ທັງນັກສຶກສາ ແລະ ຄູອາຈານ! ເຖິງວ່າຈະເປັນສະຖານະການທີ່ບໍ່ຄຸ້ນເຄີຍ ບັນດາຜູ້ເຂົ້າຮ່ວມກໍຍັງໄດ້ຖາມຄຳຖາມ ແລະ ເຂົ້າຮວ່ມການບັນຍາຍທາງອອນລາຍຢ່າງຄຶກຄື້ນ!
ການບັນຍາຍ ແມ່ນດຳເນີນເປັນພາສາອັງກິດ ແລະ ແປເປັນພາສາລາວ ໂດຍ ທ່ານນາງ ທິບພາພອນ ສີພັນດອນ, ພະນັກງານປະຈຳໂຄງການຂອງສະຖາບັນ ILSTA. ການບັນຍາຍນີ້ ແມ່ນສາມາດເຂົ້າເຖິງໄດ້ໂດຍບໍ່ເສຍຄ່າໃຊ້ຈ່າຍ ເຊິ່ງມະຫາວິທະຍາໄລລຸກຊຳບວກໄດ້ຈັດຢູ່ປະຈຳ.
ຂ່າວສານ
ພາຍໃຕ້ຂອບການຮ່ວມມືຂອງໂຄງການຮ່ວມມືລະຫວ່າງມະຫາວິທະຍາໄລ ນີ້ຖືວ່າເປັນບາດກ້າວອັນສຳຄັນ ສຳລັບນັກຄົ້ນຄວ້າໃນລາວ ທີ່ຈະສາມາດເຂົ້າເຖິງແຫຼ່ງຂໍ້ມູນເອເລັກໂຕຣນິກໄດ້ຫຼາຍຂຶ້ນ. ໃນເດືອນພະຈິກ 2019 ທີ່ຜ່ານມາ ມະຫາວິທະຍາໄລລຸກຊຳບວກ ໄດ້ສຳເລັດການເຊັນຂໍ້ຕົກລົງຮ່ວມກັບອົງການ EIFL (Electronic Information for Libraries ອົງການຂໍ້ມູນເອເລັກໂຕຣນິກສຳລັບຫ້ອງສະໝຸດ) ເຊິ່ງເປັນອົງການທີ່ບໍ່ສະແຫວງຜົນກຳໄລ ທີ່ມີປະສົບການສູງໃນການຕິດຕັ້ງຫ້ອງສະໝຸດເອເລັກໂຕຣນິກໃນປະເທດທີ່ກຳລັງພັດທະນາທົ່ວໂລກ ແລະ ຈະມາຕິດຕັ້ງຫ້ອງສະໝຸດດັ່ງກ່າວໃຫ້ກັບຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ. ຫ້ອງສະໝຸດເອເລັກໂຕຣນິກນີ້ ຈະເຮັດໃຫ້ຜູ້ໃຊ້ສາມາດເຂົ້າເຖິງແຫຼ່ງຂໍ້ມູນທາງເອເລັກໂຕຣນິກຕ່າງໆ ທັງໃນສາຂາກົດໝາຍ ແລະ ໃນສາຂາຮຽນອື່ນໆ ແລະ ທາງອົງການຍັງມີແຜນທີ່ຈະເຝິກອົບຮົມໃຫ້ແກ່ພະນັກງານຫ້ອງສະໝຸດ ຫຼື ບັນນາຮັກໃນການນຳໃຊ້ອີກດ້ວຍ.
ເຮົາສາມາດເຂົ້ານຳໃຊ້ຫ້ອງສະໝຸດເອເລັກໂຕຣນິກຜ່ານເວັບໄຊຂອງ ຄນລ (https://flp.nuol.edu.la/e-library/). ຫ້ອງສະໝຸດເອເລັກໂຕຣນິກ ເຮັດໃຫ້ສາມາດເຂົ້າເຖິງຄັງຂໍ້ມູນຫຼາຍອັນ ເຊັ່ນ ESBCO, HeinOnline, Taylor and Francis, JSTOR, Cambridge University Press journals; Oxford University Press journals, Edward Elgar Development Studies & Environment e-books and Law journals, Duke journals ແລະ OpenEdition Journals. ຄັງຂໍ້ມູນດັ່ງກ່າວ ແມ່ນປະກອບມີ ປຶ້ມໃນຮູບແບບດິຈິຕອລ ຫຼື ປຶ້ມເອເລັກໂຕຣນິກ (e-books), ວາລະສານວິຊາການ ແລະ ອື່ນໆ ເຊັ່ນ ວາລະສານ ແລະ ໜັງສືພິມ ທີ່ກ່ຽວຂ້ອງກັບກົດໝາຍ ແລະ ລັດຖະສາດ ພ້ອມທັງໃນສາຂາວິຊາອື່ນເຊັ່ນດຽວກັນ ເພາະວ່າບາງຄັງຂໍ້ມູນ ແມ່ນມີຂໍ້ມູນຈາກຫຼາຍວິຊາ. ຫ້ອງສະໝຸດເອເລັກໂຕຣນິກ ຍັງໄດ້ເຊື່ອມຕໍ່ກັບຄັງຂໍ້ມູນແບບເປີດ ທີ່ເກັບມ້ຽນບົດຄົ້ນຄວ້າ ແລະ ບົດວິທະຍານິພົນທີ່ເປັນພາສາໄທ. ການຕິດຕັ້ງຫ້ອງສະໝຸດນີ້ ແມ່ນຕິດຕັ້ງໃນນາມ ມຊ ໝາຍວ່າ ຫ້ອງສະໝຸດເອເລັກໂຕຣນິກດັ່ງກ່າວ ແມ່ນສາມາດນຳໃຊ້ໄດ້ໂດຍທຸກໆຄະນະໃນ ມຊ ເນື່ອງຈາກວ່າການເຂົ້ານຳໃຊ້ຫ້ອງສະໝຸດ ແມ່ນຜ່ານ IP address ຂອງ ມຊ (ໂດຍທີ່ບໍ່ຕ້ອງໃຊ້ລະຫັດເມື່ອເຊື່ອມຕໍ່ຜ່ານອິນເຕີເນັດຂອງ ມຊ).
ໃນວັນທີ 24-25 ກຸມພາ ທີ່ຜ່ານມາ, ຄນລ ໄດ້ຕ້ອນຮັບ ທ່ານນາງ Rima Kupryte, ຜູ້ອຳນວຍການຂອງ EIFL. ທ່ານໄດ້ມາພົບປະກັບບັນດາພາກສ່ວນທີ່ກ່ຽວຂ້ອງທັງໝົດ ເພື່ອມາໂຄສະນາຫ້ອງສະມຸດອີເລັກໂຕຣນິກດັ່ງກ່າວ ແລະ ເພື່ອກະກຽມການເຝິກອົບຮົມໃຫ້ແກ່ບັນນາຮັກ ແລະ ຄູອາຈານໃນອະນາຄົດ. ການປະຊຸມໄດ້ຈັດຂື້ນຫຼາຍຄັ້ງ ໂດຍອຳນວຍຄວາມສະດວກຂອງ ໂຄງການລາວ/031 ອົງການ LuxDev, ຫໍສະໝຸດຂອງ ຄນລ ແລະ ຫໍສະໝຸດກາງຂອງມະຫາວິທະຍາໄລແຫ່ງຊາດລາວ, ລວມທັງຮອງອະທິການບໍດີຂອງມະຫາວິທະຍາໄລແຫ່ງຊາດລາວ ທ່ານ ດຣ. ອຸດົມ ພອນຄຳເພັງ ແລະ ດຣ. ເພີຣີນ ຊິມອນ ຜູ້ປະສານງານໂຄງການຈາກມະຫາວິທະຍາໄລລຸກຊຳບວກ. ບາງຖານຂໍ້ມູນເອເລັກໂຕຣນິກທີ່ມີຂໍ້ມູນກ່ຽວກັບຫຼາຍສາຂາວິຊາທີ່ມີໃຫ້ ຄນລ ຍັງສາມາດສ້າງຜົນປະໂຫຍດໃຫ້ແກ່ຄະນະວິຊາອື່ນໆຂອງມະຫາວິທະຍາໄລແຫ່ງຊາດລາວໄດ້ອີກ. ຫ້ອງສະໝຸດເອເລັກໂຕຣນິກ ແມ່ນຈະເຊື່ອມຕໍ່ກັບເວັບໄຊຂອງຫໍສະໝຸດກາງ ມຊ ໃນໄວໆນີ້.
ການພັດທະນາຫ້ອງສະໝຸດເອເລັກໂຕຣນິກ ແມ່ນບູລິມະສິດໜຶ່ງໃນການປັບປຸງການສຶກສາທາງດ້ານກົດໝາຍ ແລະ ທັກສະການຄົ້ນຄວ້າໃຫ້ມີປະສິດທິພາບສູງຂຶ້ນ.
ຂ່າວສານ
ພາຍໃຕ້ຂອບການຮ່ວມມືຂອງໂຄງການຮ່ວມມືລະຫວ່າງມະຫາວິທະຍາໄລ ລະຫວ່າງປະເທດລຸກຊຳບວກ ແລະ ປະເທດລາວ, ຄະນະນິຕິສາດ ແລະ ລັດຖະສາດ ມະຫາວິທະຍາໄລແຫ່ງຊາດ ໄດ້ຕ້ອນຮັບຄະນະຈາກມະຫາວິທະຍາໄລລຸກຊຳບວກໃນວັນທີ 18-20 ກຸມພາ 2020 ເນື່ອງໃນ “ງານສຳມະນາການເຜີຍແຜ່ຜົນຄົ້ນຄວ້າທາງກົດໝາຍ ແລະ ວິທີຄົ້ນຄວ້າ” ເຊິ່ງນຳໂດຍ ສຈ. ສະເຕຟານ ບຣວມ, ດຣ. ເພີຣີນ ຊິມອນ ແລະ ນັກສຶກສາປະລິນຍາເອກ 4 ທ່ານ (Florence d’Ath, Teresa Quintel, Roila Mavrouili ແລະ Natalia Vorobyeva).
ຄູອາຈານສອງທ່ານຂອງ ຄນລ ອາຈານ ສົມສັກ ຫົງວິຈິດ ແລະ ອາຈານ ປາງທອງ ໄຊຍະວົງ ໄດ້ແບ່ງປັນປະສົບການຂອງພວກເຂົາໃນການຂຽນເອກະສານຜ່ານການສະໜັບສະໜູນໂດຍມະຫາວິທະຍາໄລລຸກຊຳບວກ. ນອກຈາກນັ້ນກໍຍັງມີການນຳສະເໜີກ່ຽວກັບ “ການສຶກສາປະລິນຍາເອກທີ່ປະເທດລຸກຊຳບວກ”. ກອງປະຊຸມສຳມະນາໄດ້ສຸມໃສ່ຕໍ່ກັບການສ້າງທັກສະຂັ້ນພື້ນຖານໃນການຄົ້ນຄວ້າທາງດ້ານກົດໝາຍ, ລວມເຖິງການຄົ້ນຫາແຫຼ່ງຂໍ້ມູນທີ່ໜ້າເຊື່ອຖື, ການຄັດລອກຜົນງານຂອງຜູ້ອື່ນ (plagiarism), ການອ້າງອີງ, ການຂຽນແບບວິຊາການດ້ານກົດໝາຍ ລວມໄປເຖິງການສ້າງແຜນໂຄງຮ່າງແນວຄິດ, ວິທີການປຽບທຽບກົດໝາຍ ແລະ ອື່ນໆ.
ການເຝິກອົບຮົມຈະເປັນການເຮັດກິດຈະກຳເປັນກຸ່ມທັງໝົດ. ຄູອາຈານປະມານ 35 ທ່ານຈາກ ຄນລ ໄດ້ເຂົ້າຮ່ວມ ແລະ ເຮັດກິດຈະກຳຮ່ວມກັບຄະນະຈາກລຸກຊຳບວກຢ່າງຂຸ້ນຂ້ຽວ. ການສຳມະນາໄດ້ສິ້ນສຸດລົງດ້ວຍກິດຈະກຳການຕອບຄຳຖາມທົດສອບຄວາມຮູ້ຂອງຜູ້ເຂົ້າຮ່ວມ ແລະ ລາງວັນຂອງຜູ້ໂຊກດີທີ່ໄດ້ຮັບໄຊຊະນະກໍຄື ຊັອກໂກແລັດຈາກປະເທດແບນຊິກນັ້ນເອງ!
ຂ່າວສານ
ພາຍໃຕ້ຂອບການຮ່ວມມືລະຫວ່າງໂຄງການຂອງພວກເຮົາກັບສະຖາບັນ ILSTA, ມະຫາວິທະຍາໄລລຸກຊຳບວກໄດ້ປະກອບສ່ວນໃນກອງປະຊຸມປະຈຳປີຂອງສະຖາບັນ ILSTA ຢູ່ທີ່ນະຄອນຫຼວງວຽງຈັນ ວັນທີ 11-13 ກຸມພາ 2020 ພາຍໃຕ້ຫົວຂໍ້ ອາຊະຍາກຳທີ່ມີການຈັດຕັ້ງ.
ສຈ. ສະເຕຟານ ບຣວມ ໄດ້ນຳສະເໜີບັນຍາຍໃນຫົວຂໍ້ “criminal policy ແລະ ການຫລຸດຜ່ອນການກໍ່ອາຊະຍາກຳ” ແລະ ດຣ. ເພີຣີນ ຊິມອນ ໄດ້ນຳສະເໜີໃນຫົວຂໍ້ “ຄວາມສຳຄັນຂອງຫຼັກຖານໃນການດຳເນີນຄະດີອາຍາ”.
ຜູ້ປະສານງານຍັງໄດ້ຈັດການຈຳລອງການໄຕ່ສວນ ດຳເນີນໂດຍ ຮສ. ອາແຊ ຄູດີ ຈາກປະເທດຝຣັ່ງ (ມະຫາວິທະຍາໄລ Rouen), ດຣ. ລໍເຣັ້ນ ຊີຣີ ອະດີດນັກສຶກສາປະລິນຍາເອກ ມະຫາວິທະຍາໄລລຸກຊຳບວກ ແລະ ທ່ານ ແມັກຊ ມູເລີ (ທະນາຍຄວາມ ຈາກປະເທດລຸກຊຳບວກ) ເປັນຜູ້ພິພາກສາ, ໄອຍະການ ແລະ ທະນາຍຝ່າຍຈຳເລີຍ ໃນຄະດີສົມມຸດ ສອງຄະດີ ເຊິ່ງເນັ້ນໜັກເຖິງບົດບາດຂອງຜູ້ເຂົ້າຮ່ວມໃນທີ່ປະຊຸມສານ ວ່າຄວາມຂໍ້ຫາກ່ຽວກັບການຄ້າມະນຸດ ແລະ ການຄ້າຢາເສບຕິດ/ການຟອກເງິນ. “ຜູ້ເຂົ້າຮ່ວມ” ໃນການຈຳລອງ ໄດ້ອີງຂໍ້ໂຕ້ແຍ້ງຂອງຕົນໃສ່ກົດໝາຍລາວ ແລະ ອະທິບາຍການໃຊ້ເຫດຜົນຂອງເຂົາ ໃນຊ່ວງຖາມ-ຕອບ ຫຼັງຈາກການສະແດງການຈຳລອງ.
ທ່ານສາມາດເຂົ້າເບິ່ງການຈຳລອງການໄຕ່ສວນດັ່ງກ່າວຕາມລິ້ງຂ້າງລຸ່ມ:
ການຈຳລອງການໄຕ່ສວນ ຄະດີການຟອກເງິນ ແລະ ການຄ້າຢາເສບຕິດ: https://youtu.be/9n229AkvBBw
ການຈຳລອງການໄຕ່ສວນ ຄະດີການຄ້າມະນຸດ: https://youtu.be/OrLoSxu-AFw
ຂ່າວສານ
ສາສະດາຈານ ແມັດທິວ ຮັບໂພລ, ຈາກມະຫາວິທະຍາໄລລຸກຊໍາບວກ ໄດ້ມາຢ້ຽມຢາມລາວເປັນຄັ້ງທີສອງ ເປັນເວລາອາທິດໜຶງ ໃນລະຫວ່າງວັນທີ 4-7 ຂອງເດືອນກຸມພາປີ 2020. ທ່ານໄດ້ໃຫ້ການບັນຍາຍກ່ຽວກັບກົດໝາຍລະຫວ່າງຊາດພາກລັດ ພາຍໃຕ້ຫົວຂໍ້ “ກົດໝາຍ ແລະ ການນໍາໃຊ້ສົນທິສັນຍາ” (ເນັ້ນໜັກສົນທິສັນຍາກຸງວຽນ) ໃຫ້ແກ່ອາຈານ ຄນລ 20 ທ່ານ.
ທ່ານຍັງໄດ້ໃຫ້ການບັນຍາຍພິເສດກ່ຽວກັບ “ການຂວ້ຳບາດທາງເສດຖະກິດໃນດ້ານກົດໝາຍສາກົນ ແລະ ການພົວພັນແບບສະໃໝໃໝ່” ເປັນສ່ວນໜຶ່ງຂອງການບັນຍາຍເປີດກວ້າງຂອງສະຖາບັນ ILSTA ທີ່ຈັດໃຫ້ແກ່ນັກສຶກສາ ຄນລ.